Rama në Dibër/ Berisha: Nuk foli për Skavicën, do u kushtojë qytetarëve 1 mld euro

Kreu i PD-së, Sali Berisha ka komentuar fjalimin e kryeministrit Edi Rama ditën e sotme në Dibër.

Gjatë fjalimit të mbajtur nga dritarja e banesës në protestën e sotme, Berisha tha se Rama foli për opoziën, por nuk foli për HEC-in e Skavicës.

Sipas liderit, demokrat, ai projekt, jo vetëm që përmbyt rreth 37 fshatra dhe shpërngul nga Dibra mbi 20 mijë banorë, por do peshojë mbi xhepat e qytetarëve shqiptarë 1 miliardë euro. Sipas tij, projekti për HEC-in e Skavicës nga 360 milionë u rrit në 500 dhe ka përfunduar në 1 miliard euro.

Berisha: Sot, kreu i regjimit ishte në Dibër. Atje foli për opozitën, por nuk foli një fjalë për Skavicën. A e dini o miq se Skavica përveçse përmbyt rreth 37 fshatra, përveçse shpërngul nga Dibra dhe Shqipëria mbi 20 mijë banorë, do peshojë mbi xhepat e qytetarëve shqiptarë, do rëndojë mbi supet e qytetarëve shqiptarë 1 miliard euro.

Kostoja për ndërtimin e Skavicës, nga 360 milionë u rrit në 500 dhe ka përfunduar në 1 miliard. Asnjë pushtues barbar nuk do mund të sillej në këtë mënyrë ndaj qytetarëve të vendit të pushtuar. Ai e bën sepse qytetarët për të janë për t’u vjedhur, janë për t’u mashtruar, janë për t’u përzënë nga vatrat e tyre. Të dashur miq, ai e bën këtë se ky vend nuk ka drejtësi, sepse ai drejtësinë e ka shndërruar në një seksion të partisë së tij të krimit.

Seksion i cili ndëshkon vetëm ata që i përcakton Edi Rama. Ai e bën këtë sepse ai edhe kur korrupton kryezbuluesin e SHBA, kur faktohet se ka hequr licenca dhe dhënë licenca në akt korruptiv ndaj tij, se i ka dhënë 225 mijë dollarë, përsëri për të nuk ka drejtësi.

Drejtësia nuk ekziston, drejtësia ekziston vetëm në SHBA. Atje ai dënohet, McGonigal dënohet me rreth 3 vjet, kurse Edi Rama vazhdon të tallet me shqiptarët me një cinizëm ekstrem. Vazhdon t’i vjedhë ata, t’i mashtrojë ata, t’i përzërë ata nga vendi.