"Jemi rritur me këngët e tij", Ruçi për ndarjen nga jeta të Sherif Merdarit: Dha kontribut për artin

Gramoz Ruçi, kryetari i parlamentit në largim ka reaguar pas ndarjes nga jeta të artistin Sherif Merdari.

Përmes një mesazhi ngushëllimi, Ruçi shkruan se Merdani me artin e tij, ka dhënë një kontribut emancipues për këngën dhe muzikën shqiptare.

Më tej Ruçi thotë se artisti vuajti dënime dhe sakrifikoi vite të tëra nga jeta e tij, dënime që nuk ia ndrydhën talentin dhe nuk ia pakësuan fisnikërinë.

Mesazhi i Gramoz Ruçit:

Sherif Merdani ishte një këngëtar dhe artist i madh, që i këndoi me dashuri jetës, dashurisë, nënës dhe gjithshkaje të bukur te njerëzit, shpirti dhe ndjenjat e tyre. Repertori i Sherif Merdanit është një simfoni e dashurisë dhe bukurisë njerëzore. Me artin e tij Sherif Merdani emancipoi artin, këngën dhe muzikën shqiptare.

Për këtë kontribut emancipues, ky artist i madh vuajti dënime e sakrifikoi vite të tëra nga jeta e tij. Por këto vuajtje nuk ia ndrydhën talentin dhe nuk ia pakësuan fisnikërinë. Me këngët e Sherif Merdanit jemi rritur dhe ato do të vazhdojnë të frymëzojnë brezat e ardhshëm.”, shkruan në mesazhin e tij  Kryetari i Kuvendit, Gramoz Ruçi.