Berisha vazhdon fushatën në Pogradec: Do të pesëfishojmë subvencionet për fermerët! Pensionet do të rriten po ashtu!

Kryetari i Partisë Demokratike, Sali Berisha, nga Pogradeci ku prezantoi kandidatët për deputetë për zgjedhjet e 11 majit, shpalosi disa nga premtimet kryesore të programit elektoral të PD-së, të cilin e përkufizoi si një plan për kthimin e parave te qytetarët.

Në fjalën e tij para mbështetësve, Berisha premtoi se brenda 100 ditëve të para të qeverisjes, nafta në Shqipëri do të kushtojë 40% më pak, duke mos u shitur më shtrenjtë se në Maqedoninë e Veriut apo Kosovë.

“Vendosim që brenda 100 ditëve të para të mos shitet litri i naftës më shtrenjtë sesa në vendet fqinjë. Një naftë 40% më lirë,” theksoi Berisha.

Ai u ndal gjithashtu te mbështetja për bujqësinë, duke garantuar subvencione të rritura për fermerët: “Çdo fermer do të marrë pesëfishin e subvencioneve që merr sot për çdo fidan dhe çdo kokë bagëti, njësoj si fermerët e Malit të Zi dhe Serbisë. Do të ketë kredi të buta dhe mbulim të plotë të dëmeve nga fatkeqësitë natyrore.”

Programi i PD-së parashikon gjithashtu dyfishimin e buxhetit për sektorët kyç si arsimi, shëndetësia dhe bujqësia, vendosjen e një minimumi jetik prej 200 eurosh dhe rritjen e pensioneve në 500 euro.

“Këto para janë taksat tuaja. Ne nuk do të bëjmë asgjë tjetër veçse do t’jua kthejmë ju,” përfundoi Berisha, duke kërkuar mbështetjen e qytetarëve për një ndryshim të madh në vend.