Plagosja e Erjon Vishkullit, zv.kryeministrja: Ngjarje alarmuese, por e papranueshme të shfrytëzohet

Zëvendëskryeministrja Albana Koçiu ka reaguar në lidhje me plagosjen e të riut Erjon Vishkulli, ngjarje për të cilën thekson se është një kambanë alarmi për pasojat e rënda që sjell dhuna në protesta.

Përgjatë reagimit të saj të bërë pasditen e kësaj të diele në Facebook, Koçiu kërkon që ngjarja e Erjonit të mos shfrytëzohet për propagandë dhe as për të justifikuar protestat e dhunshme që prej 13 ditësh kanë "mbërthyer" Tiranën.

“Lëndimi i të riut nga Elbasani është një kambanë alarmi për pasojat e rënda që sjell dhuna në protesta.

Është e papranueshme që një ngjarje e tillë të shfrytëzohet për propagandë dhe për të justifikuar vijimin e kësaj rruge pa krye.”, shkruan Koçiu në postimin e saj.

Po ashtu, Koçiu thekson se qeveria shqiptare është angazhuar maksimalisht për të garantuar trajtimin e të riut në një spital në Itali, si dhe transportimin e tij me avion mjekësor.