“Nuk do të ketë goditje të menjëhershme”, Trump përjashton sulmin ndaj Iranit, por tensionet mbeten të larta

Presidenti amerikan Donald Trump ka përjashtuar një sulm të menjëhershëm ushtarak ndaj Iranit, duke deklaruar se Uashingtoni nuk ka plane për të goditur Teheranin të dielën. Megjithatë, deklaratat e zyrtarëve amerikanë tregojnë se mundësia e një përshkallëzimi ushtarak mbetet e hapur.

“Përgjigjja është jo. Nuk do të ketë goditje”, tha Trump për gazetarët, ndërsa theksoi se SHBA-ja disponon dy grupe të ndryshme raportesh inteligjence për situatën në Iran.

Nga ana tjetër, një zyrtar amerikan sipas mediave të huaja deklaroi se Trump është i gatshëm të ndryshojë qasjen ndaj Teheranit dhe se një sulm mund të jetë çështje kohe.

Më herët, presidenti amerikan kishte paraqitur dy alternativa për Iranin: arritjen e një marrëveshjeje diplomatike ose përshkallëzimin e veprimeve ushtarake. Ngushtica e Hormuzit, një pikë kyçe për transportin global të naftës mbetet në qendër të tensioneve, ndërsa SHBA-ja vijon presionin detar ndaj Iranit.
 
Trump foli gjithashtu për zhvillimet në luftën Rusi-Ukrainë, duke paralajmëruar takime të mundshme diplomatike mes palëve për arritjen e një marrëveshjeje. Ai komentoi edhe protestat në disa vende evropiane, duke kritikuar politikat e migracionit, si dhe akuzoi Tajvanin se ka dëmtuar industrinë amerikane të gjysmëpërçuesve përmes çmimeve të ulëta.