Ndahet nga jeta në moshën 40-vjeçare, zbulohet shkaku i vërtetë i vd'ekjes së mundësit të njohur

Shkaku i vdekjes së mundësit të njohur të AEW-së, Pac, është bërë publik tre javë pas njoftimit për ndarjen e tij nga jeta.

Sipas gazetarit Edward Lewis të The California Post, i cili citon Zyrën e Ekzaminuesit Mjekësor të Qarkut Cook, Pac ndërroi jetë si pasojë e astmës bronkiale. Vdekja e tij është klasifikuar si natyrale.

Mundësi, emri i vërtetë i të cilit ishte Benjamin Satterley, ndërroi jetë më 27 shtator, në moshën 40-vjeçare.

Sipas raportimeve, ai u gjet pa ndjenja brenda një makine me qira, jashtë një restoranti në Des Plaines, Illinois, rreth orës 16:00, sipas orës lokale, të dielën. Autoritetet mbërritën në vendngjarje dhe më vonë konfirmuan vdekjen e tij.

Raportimet e para nuk ngritën dyshime për rrethana të jashtëzakonshme. Një përfaqësues i policisë lokale deklaroi se nuk kishte shenja të ndërhyrjes së palëve të treta dhe se rrethanat e vdekjes nuk konsideroheshin të dyshimta.

Sipas raportimit, kur policia mbërriti, telefoni i Satterley-t po binte vazhdimisht. Oficeri iu përgjigj telefonatës dhe një grua në anën tjetër të linjës tha se e njihte Pac dhe se kishte folur me të pak kohë më parë. Ajo bëri të ditur se ai po shkonte për të ngrënë drekë në restorantin CAVA.

Pas gjetjes së trupit të tij, oficerët konstatuan gjithashtu praninë e mbetjeve të një substance të identifikuar si salvia në këmishën e Satterley-t, si dhe të një medikamenti të paidentifikuar në makinën e tij. Emri i medikamentit u fshi më vonë nga raportet e incidentit.

Satterley e nisi karrierën si mundës profesionist në vitin 2004. Nga viti 2012 deri në vitin 2018, ai garoi në WWE, ku u bë i njohur edhe me emrin Adrian Neville në divizionin NXT.

Në vitin 2019, ai iu bashkua AEW-së (All Elite Wrestling). Gjatë karrierës së tij 20-vjeçare, Pac u shndërrua në një nga emrat e njohur të ringut, duke fituar titullin e parë AEW International Championship në vitin 2022, si dhe tre tituj të tjerë gjatë kohës së tij në këtë kompani.

Vetëm më pak se 24 orë para vdekjes, Satterley kishte zhvilluar një ndeshje kundër Andrade El Idolo për AEW National Championship, gjatë eventit AEW All Out, në Çikago.