Mbi 2,500 të arrestuar, Franca merr masa ekstreme në kuadër të protestave, vendoset shtetrrethim në disa qytete

Autoritetet franceze kanë vendosur masa të rrepta sigurie, përfshirë shtetrrethimin gjatë natës në disa zona të Parisit dhe qytete të tjera të vendit, pas një fundjave të shoqëruar me trazira, përplasje dhe plaçkitje.

Policia e Parisit njoftoi se shtetrrethimi do të jetë në fuqi nga ora 23:00 deri në orën 06:00 në Place de la République, ku protestuesit ishin mbledhur gjatë fundjavës, si dhe në zonën tregtare Les Halles. Gjithashtu, në disa pjesë të tjera të kryeqytetit është ndaluar organizimi i tubimeve të paautorizuara.

Masa të ngjashme janë njoftuar edhe në qytete të tjera franceze, përfshirë Marsejën, Bordonë, Nicën, Lionin dhe Lilën, ku autoritetet kanë kufizuar lëvizjen e të rinjve dhe organizimin e tubimeve gjatë natës.

Ministri i Brendshëm, Laurent Nuñez, është përballur me kritika nga opozita për mënyrën se si autoritetet u përgatitën për përshkallëzimin e protestave. Sipas raportimeve, ai ka pranuar se policia kishte “humbur kontrollin” në disa qytete. Presidenti Emmanuel Macron, ndërkohë, ka refuzuar dorëheqjen e tij.

Protestat nisën muajin e kaluar, kur studentët dolën në rrugë për të kërkuar përmirësimin e kushteve në shkolla. Me kalimin e ditëve, demonstratat u zgjeruan dhe përfshinë edhe grupe të tjera, ndërsa këtë fundjavë iu bashkuan sindikata dhe organizata të ndryshme protestuese.

Sipas të dhënave të autoriteteve, më shumë se 2,500 persona janë arrestuar gjatë trazirave. Agjencia e lajmeve AFP raportoi gjithashtu se një demonstrues humbi dorën pasi u godit nga një granatë e përdorur nga policia për kontrollin e turmës. Ndërkohë, rreth 1,000 efektivë policie janë plagosur.

Pas një takimi krize të zhvilluar të hënën, kryeministri Sébastien Lecornu njoftoi se kryetarët e bashkive do të kenë mundësinë të vendosin shtetrrethime në zonat ku e konsiderojnë të nevojshme. Ai nuk specifikoi se cilat qytete do të preken nga masat e reja.

Lecornu nuk e përjashtoi as mundësinë e shpalljes së gjendjes së jashtëzakonshme, ndërsa premtoi mbështetje financiare për zonat e dëmtuara nga trazirat.

“Do të ketë një ligj që do të vihet në fuqi për të gjetur mënyra për t’u siguruar që ata që kanë dëmtuar pronat do të duhet të paguajnë”, deklaroi kryeministri, duke theksuar se përgjegjësit për dëmet do të duhet të përballen me pasojat financiare.

Qeveria franceze njoftoi gjithashtu krijimin e një fondi për papunësinë e pjesshme, me qëllim mbështetjen e punonjësve që nuk kanë mundur të punojnë për shkak të trazirave dhe plaçkitjeve.