Kujdestarja përvetësoi mbi 600 mijë euro nga e moshuara! Përfitoi edhe nga trashëgimia mbi 2 mln euro

Gjykata e Ankonës në Itali ka dënuar me 6 vite burg një grua që punonte si kujdestare, pasi u shpall fajtore për përvetësimin e më shumë se 600 mijë eurove nga një 94-vjeçare, për të cilën kujdesej. Në këtë çështje është dënuar edhe partneri i saj, me 5 vite burg, pasi dyshohet se ka përfituar nga skema që përfshinte edhe pasurinë e të moshuarës.

Sipas hetimeve, plani dyshohet se ka nisur në shkurt të vitit 2020. Brenda disa muajsh, deri në nëntor të po atij viti, kujdestarja ka tërhequr gradualisht shuma të konsiderueshme nga llogaritë bankare të 94-vjeçares, e cila ishte e veja e një avokati të njohur në Ankona.

Por përfitimet financiare nuk janë ndalur te llogaritë bankare. Sipas dosjes hetimore, kujdestarja dyshohet se ka ndikuar te e moshuara që ta përfshinte si përfituese në disa polica sigurimi jete, me vlerë që kalonte një milion euro. Ajo kishte arritur gjithashtu të emërohej trashëgimtare universale, duke përfituar edhe dy apartamente në zonën turistike të Rivierës së Koneros.

Në total, pasuria e përfshirë në këtë çështje kap vlerën e mbi 2 milionë eurove.

Dyshimet për transaksione të parregullta u ngritën nga Guardia di Finanza, policia financiare italiane, e cila në shtator të vitit 2020 nisi hetimet që çuan në ndërhyrjen e Prokurorisë së Ankonës.

Megjithëse një ekspertim i kryer gjatë hetimeve e kishte vlerësuar 94-vjeçaren si të aftë për të kuptuar dhe për të vepruar, gjykata arriti në përfundimin se ajo ndodhej në një situatë të veçantë cenueshmërie. Sipas vlerësimit të gjyqtarit, varësia nga kujdestarja kishte ndikuar në aftësinë e saj për të marrë vendime të pavarura lidhur me pasurinë.

Ndërkohë, trashëgimtarët e ligjshëm të së moshuarës kishin arritur më herët, përmes një procesi civil, të anulonin testamentin që e linte kujdestaren si përfituese të gjithë trashëgimisë.

94-vjeçarja ndërroi jetë në maj të vitit 2025, pa mundur të mësonte përfundimin e procesit gjyqësor. Vendimi i gjykatës vjen në përmbyllje të një çështjeje të ndërlikuar, ku në qendër ishin akuzat për përvetësimin e parave dhe përfitimin e një pasurie të konsiderueshme nga një person i moshuar në gjendje cenueshmërie.