“Këpuca është vënë në këmbën e gabuar”/ Avokati i Thaçit: Vendimi i Speciales nuk ishte i ndershëm, larg së vërtetës

Pierre Richard Prosper, avokat i ekipit mbrojtës të ish-presidentit të Kosovës, Hashim Thaçi, ka komentuar vendimin e Gjykatës Speciale ndaj ish-krerëve të Ushtrisë Çlirimtare të Kosovës.

Prosper ka deklaruar se, pasi dëgjoi aktgjykimin dhe arsyetimin e gjyqtarëve, arriti në përfundimin se vendimi, sipas tij, nuk ishte i ndershëm dhe ishte larg së vërtetës.

“Kur dëgjova aktgjykimin dhe dëgjova se çfarë kishin për të thënë gjyqtarët, unë sinqerisht konkludova që ishte një vendim jo i ndershëm. Është një situatë që është shumë larg nga e vërteta, e rishkruan historinë”, ka deklaruar Prosper.

Në një intervistë për emisionin “Rubikon” në Klan Kosova, avokati theksoi se beson në sundimin e ligjit, por sipas tij, ky parim duhet të zbatohet në mënyrë objektive dhe të paanshme.

“Është një situatë ku, mbi të gjitha, duhet thënë se unë besoj në sundimin e ligjit, të gjithë besojmë në sundimin e ligjit, por sundimi i ligjit duhet të aplikohet në mënyrë objektive dhe të paanshme”, u shpreh ai.

Prosper kritikoi gjithashtu mënyrën se si, sipas tij, gjyqtarët e kanë trajtuar çështjen dhe arsyetimin e vendimit.

“Ne kemi një situatë tani ku këpuca është vënë në këmbën e gabuar. Mënyra si e kanë nxjerrë vendimin këta gjyqtarë, si e kanë trajtuar çështjen, sipas mendimit tim, ata e kanë shkelur sundimin e ligjit”, ka thënë avokati i ekipit mbrojtës të Thaçit.