Albulena Haxhiu mandaton Albin Kurtin për formimin e Qeverisë së re të Kosovës

Ushtruesja e detyrës së presidentes së Kosovës, Albulena Haxhiu, ka caktuar Albin Kurtin mandatar për formimin e Qeverisë së re të Kosovës.

Haxhiu bëri të ditur se vendimi është marrë në përputhje me Kushtetutën dhe pas propozimit të Lëvizjes Vetëvendosje.

“Në përputhje me Kushtetutën e Republikës së Kosovës dhe pas propozimit të Lëvizjes VETËVENDOSJE!, kam caktuar z. Albin Kurti mandatar për formimin e Qeverisë së Republikës së Kosovës”, ka shkruar Haxhiu.

Ajo i ka uruar Kurtit sukses në ushtrimin e përgjegjësive dhe ka shprehur shpresën që Qeveria të formohet sa më shpejt.

Pas këtij vendimi, Kurti pritet të nisë procedurat për paraqitjen e përbërjes së Qeverisë para Kuvendit të Kosovës.