Gjendet trupi i një personi të djegur brenda një makine, nuk është identifikuar

Makina del nga rruga dhe përfshihet nga flakët në Greqi, shoferi gjendet i karbonizuar, por nuk dihet kush është

Një aksident tragjik është regjistruar pasditen e së shtunës, 5 shtator, në zonën e Neos Kouvaras, në Atikë të Greqisë, ku drejtuesi i një automjeti ka humbur jetën pasi makina e tij doli nga rruga dhe u përfshi nga flakët.

Sipas të dhënave paraprake, drejtuesi dyshohet se ka humbur kontrollin e automjetit në rrugën “Michail Gkini” dhe ka dalë jashtë karrexhatës.

Makina përfundoi në një zonë me gurë dhe shkurre dhe më pas u përfshi nga flakët.

Shoferi mbeti i bllokuar brenda automjetit dhe nuk arriti të shpëtonte. Trupi i tij u gjet i pajetë dhe i karbonizuar brenda makinës gjatë operacionit për shuarjen e zjarrit.

Për shkak të gjendjes së trupit, identiteti i viktimës nuk ishte bërë ende i mundur të përcaktohej.

Flakët që nisën nga automjeti u përhapën edhe në zonën pyjore përreth, duke djegur sipërfaqe me bimësi të ulët.

Zjarri shpërtheu rreth orës 17:15 dhe u vu nën kontroll brenda një kohe të shkurtër.

Në operacionin për shuarjen e tij u angazhuan 45 zjarrfikës, 15 automjete, dy ekipe këmbësore, si dhe dy avionë dhe dy helikopterë.

Hetimet vijojnë për të përcaktuar shkakun e saktë që bëri drejtuesin të humbiste kontrollin e automjetit.