I maskuar si Batman, njeriu misterioz në Londër paguan karburantin dhe gjobat e qytetarëve

Një person misterioz, i veshur me kostumin e Batmanit, është kthyer në një fenomen në Londër, duke ndihmuar qytetarët që përballen me vështirësitë ekonomike dhe rritjen e kostos së jetesës.

I njohur si “Batmani i Londrës”, ai ka ndërmarrë një sërë nismash bamirësie, nga pagesa e karburantit për drejtuesit e automjeteve deri te shlyerja e gjobave të parkimit pranë spitaleve.

 Në një prej veprimeve të tij më të fundit, personazhi misterioz pagoi rreth 3.500 paund për karburantin e qytetarëve në një pikë furnizimi në juglindje të Londrës. Drejtuesit e automjeteve morën kuponë me vlerë 70 paund, duke krijuar radhë të gjata.

Ai ka paguar gjithashtu gjoba parkimi pranë Spitalit Kingston dhe ka mundësuar vakte me pulë e patate për vetëm një paund në një restorant në Archway.

Nismat e tij nuk ndalen këtu. Gjatë ditëve të nxehta ka shpërndarë ventilatorë portativë për pasagjerët e metrosë, ka ndihmuar në pastrimin e rrugëve dhe riparimin e gropave, si dhe ka shpërndarë çokollata me çmime simbolike.

“Ka shumë njerëz që flasin, por jo mjaftueshëm që veprojnë. Njerëzit po vuajnë dhe ne duam t’i ndihmojmë”, është shprehur ai për ITV News.

 Identiteti i Batmanit të Londrës mbetet i panjohur. Në rrjetet sociale është përfolur emri i YouTuber-it Niko Omilana, por ai ka mohuar çdo lidhje me këto veprime.

Në një kohë kur rritja e çmimeve po rëndon mbi familjet britanike, heroi misterioz synon të përcjellë një mesazh të thjeshtë: solidariteti dhe veprat konkrete mund t’u rikthejnë njerëzve shpresën.