A do ndodhë dhe në Shqipëri? Greqian ndalon rrjetet sociale për fëmijët nën 15 vjeç, ja kur ligji hyn në fuqi

Nga 1 janari i vitit 2027, fëmijët nën 15 vjeç në Greqi nuk do të mund të përdorin më rrjetet sociale. 

Parlamenti helen ka miratuar projektligjin që ndalon aksesin e këtyre fëmijëve në këto platforma online,  mes shqetësimeve në rritje për ndikimin e tyre në shëndetin dhe sigurinë e të miturve.  Kryeministri grek Kyriakos Mitsotakis tha se platformat kanë dy muaj e gjysmë për të hartuar një mënyrë për të verifikuar moshën e përdoruesve dhe për të mbrojtur privatësinë e tyre.  

Greqia është midis shtatë vendeve të Bashkimit Evropian që kërkojnë një zgjidhje për verifikimin e moshës me Komisionin Evropian. Australia ishte vendi i parë që miratoi legjislacionin për të kufizuar përdorimin e mediave sociale nga të miturit, duke e bërë këtë vitin e kaluar. Një ligj i ngjashëm i miratuar në Francë u rrëzua nga Këshilli Kushtetues i vendit në gusht.

Kujtojmë se dhe në vendin tonë, kjo ide është ngritur shpesh herë nga kryeministri Edi Rama. Fillimisht, pas vrasjes së 14-vjeçarit Martin Cani, Rama e përmendi, por në fund u ndalua vetëm përdorimi i "Tik Tok" nga të gjithë në Shqipëri, platformë që u hap sërish më vonë.  

Me nisjen e protestave të dhunshme studentore, Rama e ka rikthyer sërish këtë ide, e  madje tha se po punohet për të gjetur një mënyrë se si mund të realizohet.