"Turpërim për kombin", Trump: Biden të kërkojë falje për tërheqjen e trupave nga Afganistani

Joe Biden duhet t'i kërkojë falje të gjithë botës për tërheqjen e SHBA-ve nga Afganistani, të paktë kështu deklaron ish-presidenti amerikan, Donald Trump.Tërheqjen e organizuar nga Biden, Trump e cilësoi si një katastrofë dhe trupërim për kombin.

Deklaratat, ish-presidenti amerikan i bëri gjatë një telefonate me moderatorin Stuart Varney nga Fox Business Network.

Trump, i cili në marrëveshjen e arritur me talebanët kishte vendosur majin si muaj tërheqjeje dhe e uli numrin e trupave në 2,500 përpara se Biden të merrte detyrën, kritikoi mënyrën sesi presidenti aktual e realizoi operacionin e tërheqjes.

“Tërheqja ishte një katastrofë. Ata na thanë të largoheshim, ata na dhanë datën dhe kaq ishte. Ai operacion ishte një turpërim absolut për SHBA-të dhe admiralët dhe gjeneralët kanë të drejtë që të heqin dorë.”

Sipas Donald Trump, pasuesi i tij duhet t’u kërkojë falje amerikanëve dhe gjithë botës.

“Mendoj se gjëja më e mirë që ai mund të bëjë është t’u kërkojë falje amerikanëve dhe botës. E gjithë bota meriton një kërkim faljeje.”