Trump zgjedh Richard Grenellin si të dërguar për misione të posaçme ndërkombëtare

Presidenti i zgjedhur i SHBA-së, Donald Trump ka zgjedhur Richard Grenell, ish-shefin e tij të inteligjencës, si të dërguar presidencial për misione special.

Post ky që ka të ngjarë të drejtojë politika ndaj disa kundërshtarëve të SHBA-së, përfshirë Korenë e Veriut.

“Ric do të punojë në disa nga pikat më të nxehta në botë, duke përfshirë Venezuelën dhe Korenë e Veriut”, tha Trump në “Truth”, pa dhënë shumë detaje.

Një burim nga ekipi i tranzicionit i zotit Trump tha për agjencinë Reuters se Z.Grenell do të fokusohet gjithashtu tek tensionet në Ballkan.

Me anë të një reagimi në rrjetet sociale, Grenell u shpreh se Presidenti Trump është dikush që u gjen zgjidhje problemeve, duke i mbajtur amerikanët të sigurt dhe të begatë.

“Të punosh në emër të popullit amerikan për Donald Trumpin është nderi më i madh i jetës. Presidenti Trump është dikush që u gjen zgjidhje problemeve, duke i mbajtur amerikanët të sigurt dhe të begatë. Kemi shumë punë për të bërë. Le të fillojmë punën”, u shpreh ai.

Gjatë mandatit të parë të zotit Trump, Grenell shërbeu si ambasador në Gjermani, i dërguar i posaçëm presidencial për negociatat mes Serbisë dhe Kosovës, si edhe si Drejtor në detyrë i Zbulimit Kombëtar. Ai ka qenë prej kohësh një nga këshilltarët e politikës së jashtme të Trump.