“Thesari” i Camorras del nga muret, sekuestrohen 3.2 mln euro dhe arrestohen 34 persona

Muret e një apartamenti pranë Napolit fshihnin miliona euro para të gatshme. Karabinierët italianë kanë zbuluar rreth 3.2 milionë euro cash gjatë një operacioni të gjerë kundër mafias, i cili përfundoi me 34 persona të arrestuar.

Paratë u gjetën në një apartament në Caivano, të fshehura brenda mureve. Pamjet e publikuara tregojnë efektivët duke i shembur ato me çekiçë dhe duke nxjerrë pako me para të mbështjella me celofan e të vendosura në kova plastike.

Sipas autoriteteve, pjesa më e madhe e shumës përbëhej nga kartëmonedha 50-euroshe. Gjatë kontrolleve u sekuestruan gjithashtu disa ora luksoze.

Nga 34 personat e arrestuar, 23 u dërguan në burg dhe 11 në arrest shtëpie.

Hetimi i Prokurorisë së Napolit dhe Drejtorisë së Qarkut Anti-Mafia lidhet me një rrjet të dyshuar për trafik droge, zhvatje dhe veprimtari me metoda mafioze.

Sipas Karabinierëve, grupi dyshohet se drejtohej nga klani Angelino, aktiv në zonat e Caivano dhe Casoria.