Stuhi shiu dhe bore/ Moti i keq “bën kërdinë” në këtë shtet, të paktën 60 të vdekur

Të paktën 60 njerëz kanë vdekur në tre javët e fundit në Afganistan mes reshjeve të borës dhe shiut, tha sot ministria e menaxhimit të fatkeqësive.

“Informacionet e para nga provincat janë rreth 60 të vdekur dhe 23 të plagosur për shkak të reshjeve të borës dhe shiut që nga 20 shkurti”, tha në një deklaratë zëdhënësi i ministrisë Janan Sayek.

Të paktën 1,645 shtëpi u shkatërruan ose u dëmtuan në të gjithë vendin dhe gati 178,000 kafshë u humbën, tha ai. Dimri i vonë është tradicionalisht një kohë e motit të keq vdekjeprurës në Afganistan. Kështu, në provincën Herat, në perëndim, kanë ndodhur përmbytje të papritura pas reshjeve të dendura të shiut që nga mbrëmja e së hënës.

Pesë anëtarë të së njëjtës familje humbën jetën dje dhe dy u plagosën kur çatia e shtëpisë së tyre u shemb nga reshjet në kryeqytetin Herat, njoftoi për shtyp Abdul Zaher Nurzai nga Agjencia për Menaxhimin e Fatkeqësive Natyrore. Rreth 250 shtëpi u shkatërruan në Heratin qendror dhe pjesë të tjera të provincës, ndërsa sipërfaqe të mëdha të tokës bujqësore u përmbytën, shtoi ai, duke theksuar se këto ishin shifra të përkohshme.

Nurzai sqaroi se ende nuk është bërë e mundur shpërndarja e ndihmës emergjente në zonat e prekura, por kjo pritet nesër. Ashtu si shumë shtëpi të tjera, ajo ku u vra familja u dëmtua nga tërmetet që vranë më shumë se 1,000 njerëz në provincën e Heratit në fillim të tetorit, tha për AFP Naqibullah, një imam në një xhami të Heratit. Tre tërmete të njëpasnjëshme shkatërruan ose i bënë të pabanueshme 31 mijë shtëpi në këtë krahinë.