Studimi paralajmëron: Mësimi online po shkatërron mendjen e fëmijëve

Mendja e fëmijëve po shkatërrohet gjatë pandemisë, kjo për shkak se ata nuk po bëjnë mësim normal, por përmes internetit. Kështu ka thënë një studimi i ri nga Qendra Amerikane për Kontrollin dhe Parandalimin e Sëmundjeve. Prindërit, fëmijët e të cilëve zhvilluan mësim online ose të kombinuar, kishin më shumë të ngjarë të raportonin rritje të rrezikut në 11 nga 17 treguesit e mirëqenies së fëmijëve dhe prindërve.

Studiuesit shikuan përgjigjet e sondazhit nga tetori dhe nëntori i 2020, të 1290 prindërve të fëmijëve nga mosha 5 -12 vjeç. Gati 25% e prindërve fëmijët e të cilëve zhvilluan mësim online, raportuan përkeqësim të shëndetit mendor ose emocional te fëmijët e tyre, krahasuar me 16% të prindërve fëmijët e të cilëve morën udhëzime personale.

Ata gjithashtu raportuan se, fëmijët e tyre ishin më pak aktivë fizikisht, kalonin më pak kohë jashtë apo me miqtë e tyre. Edhe prindërit po i ndiejnë efektet e mësimit online. Rreth 54% e prindërve kanë raportuar shqetësime emocionale. Gjithashtu, ata raportuan humbje të vendit të punës, shqetësimet mbi stabilitetin e punës, sfidat e kujdesit për fëmijët, konfliktin midis punës dhe sigurimit të kujdesit për fëmijë dhe pagjumësi.