Raporti: Bota mund ta parandalonte Covid-19, ja çfarë ndodhi

Prej një viti e disa muaj, e gjithë bota është gjunjëzuar nga Covid-19, duke shkaktuar miliona viktima dhe të prekur. Dëmet për shkak të kësaj pandemie nuk janë vetëm në njerëz, por edhe në ekonomi. Ndërkohë, një panel i pavarur global ka publikuar një raport, që tregon se bota mund ta kishte parandaluar këtë pandemi. Paneli global u drejtua nga ish-kryeministrja e Zelandës së Re, Helen Clark, dhe ish-presidentja e Liberisë, Ellen Johnson Sirleaf.

Paneli i Pavarur për Gatishmërinë dhe Reagimin ndaj Pandemisë në raport kishte bërë me dije se ka ekzistuar një “koktej toksik” i përbërë nga hezitimi dhe koordinimi i dobët duke bërë që shenjat paralajmëruese të mos dëgjoheshin. Ekspertët e këtij paneli shprehen se kanë qenë një sërë vendime të gabuara që e çuan situatën në këtë gjendje.

Raporti thotë se bota ka nevojë për përmirësime në sistemin global të emergjencës në mënyrë që të parandalojë një katastrofë të ngjashme.