Pas paralajmërimit të SHBA-së për ngushticën e Hormuzit, Irani KËRCËNON Trumpin me VDEKJE

Një zyrtar i lartë i sigurisë iraniane ka lëshuar një kërcënim të drejtpërdrejtë ndaj presidentit amerikan Donald Trump, ndërsa tensionet mes SHBA-së, Izraelit dhe Iranit vijojnë të përshkallëzohen.

Sekretari i Këshillit Suprem të Sigurisë Kombëtare të Iranit, Ali Larijani, reagoi ndaj paralajmërimeve të Uashingtonit duke deklaruar se Irani nuk i frikësohet kërcënimeve amerikane. “Kombi i Iranit nuk ka frikë nga kërcënimet tuaja në letër. Edhe ata më të fortë se ju nuk kanë arritur ta zhdukin kombin iranian. Kini kujdes që të mos zhdukeni!”, u shpreh ai.

Deklarata e Larijanit erdhi pasi Trump paralajmëroi se Shtetet e Bashkuara do ta godisnin rëndë Iranin nëse Teherani do të përpiqej të bllokonte Ngushticën e Hormuzit, një nga korridoret më të rëndësishme të transportit të naftës në botë.

Në një postim në platformën Truth Social, Trump shkroi se nëse Irani ndërhyn për të ndalur rrjedhën e naftës përmes kësaj ngushtice, vendi do të goditet “njëzet herë më fort” nga SHBA sesa është goditur deri tani.

Larijani, ish-anëtar i Gardës Revolucionare Islamike, konsiderohet një nga figurat më me ndikim në politikën iraniane. Situata në rajon është tensionuar edhe më shumë pas vdekjes së ish-udhëheqësit suprem Ali Khamenei në një sulm ajror, pas së cilës Irani emëroi një lider të ri suprem.

Ndërkohë, përshkallëzimi i konfliktit mes Shteteve të Bashkuara, Izraelit dhe Iranit ka ndikuar edhe në tregjet globale, duke shkaktuar luhatje të çmimeve të naftës në tregjet ndërkombëtare./Shqip