Një vit para zgjedhjeve – Qeveria italiane heq taksën e qarkullimit për automjetet, Tajani: E papërballueshme

Kryeministrja italiane Giorgia Meloni njoftoi sot se qeveria do të heqë tarifën e qarkullimit për 14.5 milionë automjete dhe motoçikleta.

Masa vjen në një kohë kur qeveria po kërkon mënyra për të rritur mbështetjen e saj, në prag të zgjedhjeve të përgjithshme që pritet të zhvillohen vitin e ardhshëm.

Zëvendëskryeministri dhe ministri i Jashtëm, Antonio Tajani, shkroi në një postim në platformën X se nga sot hiqet një taksë që e cilësoi si “të padrejtë” dhe “të papërballueshme”.

“Sot, qeveria heq një nga taksat që italianët e urrejnë më shumë”, deklaroi Meloni në një njoftim të publikuar nga zyra e saj.

Masa do të zbatohet për të gjitha motoçikletat dhe për më shumë se 70% të automjeteve të vogla dhe të mesme.

Megjithatë, qytetarët do të mund ta përfitojnë këtë lehtësi vetëm për një automjet në pronësi të tyre, bëri të ditur zyra e Këshillit të Ministrave.

Zgjedhjet e vitit të ardhshëm pritet të jenë një garë e fortë mes koalicionit të djathtë të Melonit dhe opozitës së qendrës së majtë.

Qeveria nuk ka bërë të ditur se sa do të jetë kostoja që heqja e tarifës së qarkullimit do të ketë për financat publike.