"Ndaloni për 20 vite programin bërthamor ose do ...", Trump rrit presionin ndaj Iranit, Khamenei: Jemi gati të përballemi me SHBA-në

Presidenti i Shteteve të Bashkuara, Donald Trump, ka paralajmëruar mundësinë e rikthimit të veprimeve ushtarake amerikane ndaj Iranit, nëse vendi nuk pranon të ndalojë për 20 vite programin e tij bërthamor.

Deklaratat u bënë gjatë kthimit të tij nga Kina drejt SHBA-së, ku Trump u shpreh se durimi i tij me Teheranin po shteron dhe se një marrëveshje përfundimtare duket ende larg.

Sipas tij, në mungesë të një dakordësie, SHBA-të mund të ndërmarrin sërish veprime ushtarake, duke lënë të hapur mundësinë e ndërhyrjes për “pastrim” të situatës në Iran.

Trump gjithashtu deklaroi se një armëpushim i përkohshëm me Iranin është arritur me ndërhyrjen e disa aleatëve ndërkombëtarë, duke përmendur Pakistanin si një prej vendeve që ka luajtur rol në këtë proces.

Ndërkohë, ka reaguar edhe lideri Suprem i Iranit, Mojtaba Khamenei, i cili është shprehur se Irani është i përgatitur për përballje me Shtetet e Bashkuara dhe se populli iranian do të vazhdojë të mbrojë pavarësinë dhe identitetin e tij kombëtar.

Khamenei theksoi se rezistenca e vendit është forcuar përballë presioneve të jashtme, ndërsa përballja me SHBA-në, sipas tij, është pjesë e mbrojtjes së sovranitetit iranian.

Tensionet mes Uashingtonit dhe Teheranit mbeten të larta, ndërsa përpjekjet për një marrëveshje mbi programin bërthamor iranian vijojnë të mos japin rezultate konkrete.