Momente paniku / Turistët rëmbehen nga rrjedha e fuqishme e ujit në ujëvarë, shpëtohen në minutën e fundit (VIDEO)

Momente të frikshme përjetoi një grup turistësh në ujëvarën Mae Sa, në provincën Chiang Mai të Tajlandës, pasi një rritje e menjëhershme e nivelit të ujit shkaktoi një rrjedhë të fuqishme që i përfshiu dhe i tërhoqi zvarrë.

Ngjarja ndodhi më 15 gusht, kur turistët ndodheshin mbi shkëmbinj në shtratin e ujëvarës. Në pamjet e filmuara nga dëshmitarët dhe të shpërndara në rrjetet sociale, ata shihen duke luftuar për të qëndruar në këmbë dhe duke u përpjekur të ndihmojnë njëri-tjetrin.

Ndërhyrja e stafit të parkut ishte e menjëhershme dhe turistët u nxorën në mënyrë të sigurt nga zona. Sipas informacioneve, ata pësuan vetëm dëmtime të lehta dhe gërvishtje, ndërsa morën ndihmën e parë në vendngjarje.

Një dëshmitar tregoi se vetëm pak sekonda përpara ndryshimit të papritur të rrjedhës së ujit kishte dëgjuar një bilbil paralajmërues nga një punonjës i parkut.

Ai tha se po përgatitej t’i afrohej ujëvarës për të bërë fotografi kur niveli i ujit filloi të rritej me shpejtësi.

Pas incidentit, autoritetet kufizuan përkohësisht aksesin e vizitorëve në ujëvarën Mae Sa për arsye sigurie. Ngjarja riktheu vëmendjen te rreziku i ndryshimeve të menjëhershme të prurjeve në zonat turistike me ujëvara, veçanërisht gjatë periudhave me reshje të dendura.