Mësuesi hero shpëton 1,643 nxënës nga katastrofa natyrore: Dilni shpejt jashtë, jemi në rrezik

Një histori heroizmi është shënuar në Nepal, ku mësuesi 47-vjeçar Rajendra Dawadi arriti të shpëtonte 1,643 nxënës nga një përmbytje e fuqishme që goditi luginën e Trishulit.

Ngjarja ndodhi rreth orës 09:20 të mëngjesit, kur në shkollën e mesme Tribhuvan Trishuli ndodheshin rreth 900 nxënës, ndërsa qindra të tjerë po mbërrinin me autobusë dhe në këmbë. Dawadi mori një telefonatë nga një mik në Betrawati, rreth 8 kilometra më lart në luginë, i cili e paralajmëroi se lumi kishte përfshirë fshatin.

Fillimisht, mësuesi vlerësoi se ndërtesa e betonit, e ndërtuar rreth 60 metra mbi nivelin e lumit, ishte e sigurt. Por pasi një prind e paralajmëroi se niveli i ujit po rritej me shpejtësi, Dawadi ra zilen e shkollës për të dhënë sinjalin e evakuimit.

Mësuesit nisën të nxirrnin nxënësit nga klasat dhe t’i drejtonin drejt zonave më të larta. Në të njëjtën kohë, Dawadi kontaktoi shoferët e autobusëve të shkollës, të cilët transportonin rreth 80 fëmijë secili. Ai arriti të kontaktonte të gjithë, përveç një autobusi.

Kur pa autobusin duke kaluar urën, Dawadi i bëri shenjë shoferit të kthehej menjëherë. Autobusi arriti të kalonte në anën tjetër, ndërsa pak çaste më vonë ura u shemb nga fuqia e ujit.

Nxënësit u dërguan në një zonë më të sigurt, pranë një peme bodhi, ndërsa përmbytja shkatërroi shkollën dhe ndryshoi peizazhin përreth. Fatkeqësisht, mësuesi Santos Pariyar dhe punonjësi i mirëmbajtjes Sultan Lama humbën jetën pasi u kthyen në zonat e rrezikuara.

Përmbytja u shkaktua nga shembja e një mase të madhe akulli dhe shkëmbinjsh në Himalaje, e cila krijoi një rrjedhë gjigante uji, balte dhe mbetjesh. Katastrofa shkatërroi banesa, ura dhe rrugë, ndërsa shkencëtarët paralajmërojnë se shkrirja e akullnajave dhe temperaturat në rritje po shtojnë rrezikun e ngjarjeve të tilla.

Kur banorët e cilësuan Dawadin si hero, ai u përgjigj thjesht: “Çfarë tjetër mund të bëja?”