Mediat arabe: Brenda orëve të ardhshme arrihet marrëveshje SHBA-Iran për hapjen e Ngushticës së Hormuzit

Mediat saudite raportojnë se zhvillimet në lidhje me Ngushticën e Hormuzit dhe rihapjen e saj priten në orët në vijim.

Sipas Al Hadath dhe Al Arabiya, palët kanë arritur një marrëveshje që mund të lejojë lëvizjen e anijeve të bllokuara në ngushticë.

“Pritet përparim në orët në vijim lidhur me anijet e bllokuara në Ngushticë”, raportoi Al Hadath, duke shtuar se është diskutuar një lehtësim gradual i bllokadës.

Ndërkohë, Al Arabiya raportoi, duke cituar burime, se është arritur një marrëveshje për heqjen e bllokadës amerikane në këmbim të rihapjes graduale të ngushticës.

Sipas raportimeve, anijet që kanë mbetur të bllokuara mund të lejohen të kalojnë në orët e ardhshme.

Ngushtica e Hormuzit ka qenë kryesisht e mbyllur që nga shkurti, duke ndikuar në rreth 25% të tregtisë globale të naftës përmes transportit detar dhe duke rritur kostot për kompanitë e transportit.