Luftanija amerikane qëllon 30 herë me paralajmërim ndaj anijeve të ushtrisë iraniane

Situatë e tensionuar gjatë ditës së hënë në Ngushticën e Hormuzit, ku një anije e Rojes Bregdetare amerikane bëri rreth 30 të shtëna paralajmëruese ndaj një grupi anijesh të shpejta të Rojeve Revolucionare Iraniane.

Sipas zëdhënësit të Pentagonit, John Kirby e gjithë kjo situatë u krijua pasi anijet iraniane nisën të kryenin manovra të rrezikshme pranë mjeteve lundruese amerikane.

6 anije të ushtrisë amerikane ishin duke shoqëruar një nëndetëse në Hormuz kur 13 varka iraniane u afruan me shpejtësi rreth tyre duke qëndruar jo më larg se 130 m.

“Ushtarakët amerikanë u përpoqën dhe ndoqën të gjitha procedurat e nevojshme, duke vendosur dhe kontakte radio, por nuk pati asnjë reagim.

Më pas, anija “Cutter Maui” qëlloi rreth 30 herë dhe pas raundit të dytë të të shtënave anijet iraniane u tërhoqën”, u shpreh Kirby rreth incidentit, citon a2 cnn.