Lufta/ Shkelet armëpushimi, SHBA nis sulmet në Iran, pas goditjes së anijes së mallrave në Ngushticën e Hormuzit

Ushtria amerikane ka kryer sulme ndaj objektivave iraniane pasi Presidenti Donald Trump akuzoi Iranin për një "shkelje të pamend" të armëpushimit, pas një sulmi ndaj një anijeje mallrash në Ngushticën e Hormuzit.

Sipas mediave të huaja, Komanda Qendrore e SHBA-së tha se kishte goditur objektet e magazinimit të raketave dhe dronëve, si dhe pozicionet bregdetare të radarëve të premten.

Thuhet se sulmet ishin në përgjigje të një sulmi me dron ndaj një anijeje mallrash të enjten, një incident që ndaloi një evakuim të planifikuar të mijëra marinarëve të bllokuar në rajon.

Teherani tha se anija e mallrave u sulmua sepse po përdorte një rrugë të paautorizuar për të kaluar nëpër Ngushticën e Hormuzit.

Komanda Qendrore e SHBA-së - ose Centcom - i përshkroi sulmet si "një përgjigje të fuqishme" ndaj sulmit me dron një ditë më parë.

“Agresioni i pajustifikuar kundër anijeve tregtare nga forcat iraniane shkeli qartë armëpushimin”, thuhej në deklaratën e Komandës Qendrore të SHBA.

Centcom tha se ushtria amerikane do të “vazhdojë të ofrojë koordinim dhe mbështetje për kalimin e sigurt për anijet tregtare që kalojnë nëpër ngushticë”.

Por Korpusi i Gardës Revolucionare Islamike (IRGC) të Iranit fajësoi "regjimin amerikan që shkeli traktatin".

Në një deklaratë, thuhet se SHBA-të kishin nisur një sulm ajror në bregdetin e Iranit "me pretekste të ndryshme të një anijeje që shkelte një rrugë të paautorizuar në Ngushticën e Hormuzit".

Garda Revolucionare e Iranit (IRGC) tha se marina e saj ishte hakmarrë duke goditur pozicionet ushtarake amerikane në rajon, pa dhënë detaje të mëtejshme.