Lufta kundër Covid-19, Gjermania i vjen në ndihmë Ballkanit Perëndimor, i dhuron 3 milionë vaksina

Në luftën kundër Covid-19, Gjermania ka vendosur që ti dhurojë vendeve të Ballkanit Perëndimor 3 milionë vaksina. Lajmin e dha kancelarja gjermane, Angela Merkel gjatë një takimi virtual me kryeministrat e Ballkanit Perëndimor në kuadër të Procesit të Berlinit.

“Është në interesin e Bashkimit Evropian që ta çojë përpara këtë proces”, tha Merkel në një konferencë me gazetarët, pas përfundimit të takimit ku mblodhi për herë të fundit përfaqësuesit e Ballkanit Perëndimor, duke lënë të nënkuptohet se po flet për ndikimin e Rusisë dhe Kinës në rajon, por pa i përmendur ato.

Kancelarja Merkel tha se gjatë takimit virtual, presidenti francez, Emmanuel Macron, kishte shprehur “shumë qartë” mbështetjen e tij për ardhmërinë evropiane të gjashtë vendeve të Ballkanit. Në samit morën pjesë përfaqësues nga Kosova, Serbia, Shqipëria, Maqedonia e Veriut, Bosnje Hercegovina, Mali i Zi, si dhe zyrtarë të lartë të Bashkimit Evropian.