Kryeministri Starmer lë të hapur ndalimin e protestave pas sulmit në Londër

Kryeministri britanik Keir Starmer ka deklaruar se nuk përjashtohet mundësia e ndalimit të disa protestave në Mbretërinë e Bashkuar, veçanërisht kur në to përdoren slogane që nxisin dhunë, pas një sulmi antisemit të ndodhur në Londër.

Duke folur për BBC, Starmer tha se situata ka ndryshuar ndjeshëm pas sulmit me thikë në zonën Golders Green, të cilin autoritetet e kanë cilësuar si akt terrorist dhe nga i cili mbetën të plagosur dy persona hebrenj.

Ai u shpreh se komuniteti hebre ka shprehur shqetësime të vazhdueshme për sigurinë, sidomos në lidhje me protestat pro-palestineze dhe slogane të caktuara që përdoren në këto tubime.

Qeveria britanike ka njoftuar një paketë masash për rritjen e sigurisë, përfshirë fonde shtesë për mbrojtjen dhe shtimin e patrullimeve policore në zona të ndjeshme.

Starmer theksoi se, ndonëse mbështet lirinë e shprehjes dhe protestat paqësore, thirrjet që nxisin dhunë ose urrejtje janë të papranueshme dhe mund të çojnë në masa më të forta, përfshirë edhe kufizimin e disa tubimeve.

Ndërkohë, autoritetet britanike kanë rritur nivelin e kërcënimit terrorist në “serioz”, duke paralajmëruar rrezikun e një sulmi të mundshëm në muajt e ardhshëm, në një klimë tensionesh në rritje dhe incidentesh të përsëritura me motive ekstremiste.