Ish-princit Andrea i ndalohet të hipë në kalë ndërsa vazhdojnë hetimet

Ish-Princi Andrew po humbet një tjetër nga zakonet e tij të preferuara: atij i është ndaluar të hipë mbi kalë pas arrestimit të tij nën dyshimin për sjellje të keqe në detyrën publike.

Sipas raportimeve të medias britanike, zyrtarët e pallatit e paralajmëruan ish-princin se do të ishte një “përshtypje e keqe” ta shihnin duke u argëtuar mbi kalë ndërsa ishte nën hetim policor.

Ish-princi u arrestua nga Policia e Luginës së Thames të enjten e kaluar, në ditëlindjen e tij të 66-të, dhe u mor në pyetje për 11 orë përpara se të lirohej dhe të lejohej të kthehej në shtëpinë e tij të re në Wood Farm.

Ai akuzohet se ka ndarë informacione konfidenciale me pedofilin Jeffrey Epstein ndërsa shërbente si i dërguari tregtar i Mbretërisë së Bashkuar.

“Që nga arrestimi i tij javën e kaluar, atij i është urdhëruar të mos hipë mbi kuaj. Kjo konsiderohet e shëmtuar. Ata nuk mendojnë se duhet të shihet duke buzëqeshur mbi kalin e tij”, tha një burim.

Kufizimet përfaqësojnë një tjetër goditje për ish-princin, i njohur për pasionin e tij për hipjen mbi kuaj dhe i cili u pa duke hipur pak pasi titujt e tij iu hoqën vitin e kaluar.

Zbulimi vjen ndërsa qeveria e Mbretërisë së Bashkuar përgatitet të publikojë dokumente që detajojnë emërimin e tij si i dërguar tregtar.

Lord Mandelson, ish-ambasadori në Shtetet e Bashkuara, u arrestua gjithashtu me akuza për sjellje të keqe në detyrën publike, pas akuzave të ngjashme se ai i ka kaluar informacione të ndjeshme Epsteinit./Lajmi i Fundit