FOTO/14 vite nga 21 janari, familjarët e protestueve të vrarë homazhe në Bulevardin “Dëshmorët e Kombit”

Sot shënohen 14 vite nga protesta e 21 Janarit në bulevardin “Dëshmorët e Kombit” në Tiranë, ku mbetën të vrarë katër qytetarë.

Si çdo vit, edhe ditën e sotme janë zhvilluar homazhe në Bulevard për 4 viktimat Ziver Veizi, Aleks Nika, Hekuran Deda dhe Faik Myrtaj.

Familjarët e viktimave vendosën lule në vendin ku u vranë të dashurit e tyre. Ata u shoqëruan nga kryeparlamentarja Elisa Spiropali, zëvendëskryeministrja Belinda Balluku, ministrat Taulant Balla dhe Ogerta Manastirliu.

Në këto homazhe mungoi kreu i qeverisë, Edi Rama, i cili ndodhet në Zvicër në Forumin e Ekonomisë në Davos. Megjithatë Rama përkujtoi 21 janarin përmes një reagimi në Facebook.

“21 Janar “Drejtësia vonon po nuk harron”, thotë populli dhe sot kush po e vonon drejtësinë për 21 janarin, nuk duhet të harrojë se fëmijët e dëshmorëve po bëhen prindër duke pritur drejtësinë…”, tha kryeministri.

Dosja për “21 Janarin” po hetohet nga Struktura e Posaçme Kundër Korrupsionit dhe Krimit të Organizuar pas një vendimi të Gjykatës së Lartë më 12 mars 2024.

Vendimi u mor pas rekursit të bërë nga familjarët e viktimave, Aleks Nika, Ziver Veizi, Hekuran Deda dhe Faik Myrtaj.

Më 21 janar 2011, opozita e atëhershme, sot në qeveri, protestoi para Kryeministrisë.

Protesta degradoi në dhunë dhe përplasje ndërsa nga brenda Kryeministrisë u hap zjarr duke sjellë edhe bilancin tragjik me katër viktima.

Edhe pse kanë kaluar 14 vite nga ajo ditë familjarët thonë se ende nuk po shohin drejtësi për të afërmit e tyre.