Droni goditi rezervuarin e karburantit, pezullohen fluturimet në aeroportin kryesor të Dubait

Fluturimet në aeroportin kryesor të Dubait janë pezulluar përkohësisht pasi një dron goditi një rezervuar karburanti në afërsi të aeroportit.

Zyra për media e Dubait njoftoi se shërbimet e emergjencës ndërhynë për të shuar një zjarr që shpërtheu pas një incidenti të lidhur me një dron pranë Aeroportit Ndërkombëtar të Dubait. Në një postim në rrjetin social X u bë e ditur se është prekur një nga rezervuarët e karburantit, ndërsa deri më tani nuk raportohen persona të lënduar.

Autoritetet aeroportuale theksuan se fluturimet janë pezulluar përkohësisht si masë paraprake dhe u kanë bërë thirrje pasagjerëve të qëndrojnë larg zonës.

Si pasojë e incidentit, disa avionë janë devijuar drejt aeroportit tjetër të qytetit, Al Maktoum International.

Ky është incidenti i tretë i ngjashëm në aeroport që nga fillimi i luftës në Iran. Gjatë javëve të fundit, dronë dhe raketa të shumta kanë goditur qytet-shtetin, duke dëmtuar imazhin e tij si një vend i sigurt, megjithëse shumë prej tyre janë neutralizuar.