Bota në ‘alarm’ për shpërthimin e Hantavirusit, OBSH: Nuk ka rrezik për një pandemi si Covid-19!

Organizata Botërore e Shëndetësisë ka reaguar zyrtarisht pas alarmit të ngritur nga rastet e raportuara të hantavirusit në bordin e anijes turistike MV Hondius.

Drejtori i përgjithshëm i OBSH-së, Tedros Adhanom Ghebreyesus, deklaroi se hetimet për shpërthimin janë ende në zhvillim.

Ai u përpoq të qetësonte shqetësimet publike, duke theksuar se situata nuk përbën rrezik për një pandemi të ngjashme me COVID-19.

Sipas OBSH-së, hantavirusi transmetohet ndryshe nga koronavirusi dhe zakonisht kërkon kontakt të zgjatur me burimin e infeksionit, çka e bën rrezikun për përhapje masive shumë më të ulët.

Deri tani janë konfirmuar pesë nga tetë rastet e dyshuara, ndërsa të gjithë personat e prekur kanë qenë në bordin e MV Hondius.

Autoritetet shëndetësore paralajmërojnë se mund të identifikohen raste të tjera, pasi periudha e inkubacionit të virusit mund të zgjasë deri në gjashtë javë.

Organizata Botërore e Shëndetësisë tha gjithashtu se rreziku mbetet i ulët edhe për Canary Islands, destinacioni ku po lundron aktualisht anija.

Hetuesit dyshojnë se çifti i parë i infektuar kishte vizituar zona ku jeton një specie miu e njohur si bartëse e hantavirusit.