“Amerika do hakmerret”, Biden reagon pas vrasjes së 3 ushtarëve

Presidenti amerikan Joe Biden premtoi se do të reagojë pasi 3 ushtarë amerikanë mbetën të vrarë në një sulm me dron në veri-lindje të Jordanisë, ku rreth 30 të tjerë mbetën të plagosur.

Droni shpërtheu në afërsi të dhomave të ushtarëve dhe sipas Biden, personat përgjegjës janë grupet e armatosura radikale të mbështetura nga Irani.

Grupe të ndryshme radikale u zotuan se do të hakmerreshin ndaj Amerikës, që mbështet Izraelin, i cili nuk heziton të sulmojë vendet fqinje.

Të dielën, një seri e re sulmesh ajrore dhe artilerie u krye në Liban. Izraeli deklaroi se kishte goditur objektiva të infrastrukturës terroriste që i përkisnin lëvizjes Hezbollah.

Ndërkohë, sulme gjatë së dielës u kryen edhe në Gaza, ku ndërtesa të shumta u shembën. Banorët nisën kërkimet nën rrënoja për të gjetur të mbijetuar. Disa prej tyre u dërguan në spital, ndërkohë që të tjerë druhet se ndodhen ende poshtë gërmadhave.

Në të njëjtën kohë, grupe të ndryshme në Izrael nisën planet për ndryshimet e pasluftës. Në një konferencë të mbajtur në Jerusalem, pjesëmarrës të shumtë bënë thirrje për rikthimin në vendbanimet hebraike në Gaza dhe në veri të Bregut Perëndimor.

Vendbanimet në fjalë u braktisën në vitin 2005 në kuadër të planit të ish-kryeministrit Ariel Sharon, për një angazhim të njëanshëm.