Agjentët pla'gosin 28-vjeçaritn, qytetarët ndërmarrin hapin ekstrem në mbrojtje të tij

Një operacion i agjentëve të emigracionit në SHBA është kthyer në një incident me armë zjarri në Teksas, ku një 28-vjeçar venezuelian është qëlluar dhe plagosur rëndë nga një agjent i ICE. Ngjarja ka ndodhur të dielën në Austin, duke shkaktuar reagime të forta dhe protesta pranë vendit ku u zhvillua operacioni.

I plagosuri është identifikuar si Wilber Rafael Garces Perez, 28 vjeç. Sipas raportimeve, gjithçka nisi pas ndalimit të një automjeti. Pas kësaj, 28-vjeçari është larguar në këmbë dhe ka nisur një ndjekje, gjatë së cilës një agjent i ICE ka përdorur armën. Garces Perez u qëllua në pjesën e trupit dhe u dërgua në spital. Gjendja e tij raportohet e rëndë, por e qëndrueshme.

Policia: Nuk ishim pjesë e operacionit

Një tjetër element që ka nxitur debat është fakti se Policia e Austin nuk ishte e përfshirë në operacionin e ICE. Shefja e policisë lokale, Lisa Davis, ka deklaruar se efektivët e Austin nuk morën pjesë në operacion dhe nuk ishin të pranishëm në momentin kur u qëllua 28-vjeçari.

Kryebashkiaku i Austin, Kirk Watson, ka kërkuar që autoritetet lokale të kenë rol në hetimin e incidentit, ndërsa prokuroria e qarkut Travis ka kërkuar akses në provat e çështjes.

Versione të ndryshme për 28-vjeçarin

Rasti ka hapur gjithashtu debat mbi statusin e emigrantit venezuelian. Departamenti amerikan i Sigurisë Kombëtare ka deklaruar se Garces Perez kishte hyrë në mënyrë të paligjshme në SHBA dhe se ndaj tij ekzistonte një urdhër përfundimtar dëbimi.

Por avokatja e familjes ka kundërshtuar disa prej të dhënave të bëra publike nga autoritetet amerikane dhe ka kërkuar sqarimin e plotë të rrethanave të incidentit. Pikërisht mënyra se si u zhvillua përballja dhe arsyeja që çoi në përdorimin e armës nga agjenti federal pritet të jenë në qendër të hetimit.

Rreth 100 persona në protestë

Pas të shtënave, rreth 100 persona u mblodhën pranë vendit të ngjarjes, duke protestuar kundër operacioneve të ICE dhe mënyrës së zbatimit të politikave amerikane të emigracionit.

Incidenti vjen në një periudhë kur operacionet e ICE janë intensifikuar ndjeshëm në Shtetet e Bashkuara, duke shkaktuar përplasje dhe protesta në disa qytete.

Hetimi pritet të përcaktojë nëse përdorimi i armës nga agjenti federal ishte i justifikuar dhe cilat ishin saktësisht rrethanat që çuan në plagosjen e 28-vjeçarit./SHEKULLI