Zbulohet emri, kush është 55-vjeçari që humbi jetën në aksidentin me 4 të pla'gosur në Tepelenë

Një aksident me pasojë vdekje është regjistruar mëngjesin e kësaj të hëne në autostradën Levan-Tepelenë pranë vendit të quajtur “Rrethrrotullimi i Levanit”.

Bëhet e ditur se, dy automjete tip “Audi” dhe “Benz” janë përplasur me njëra-tjetrën dhe si pasojë e përplasjes së fortë ka humbur jetën drejtuesi i “Audit”. Viktimë ka mbetur Dashmir Beca, 55 vjeç.

Tre pasagjerët që ndodheshin tek “Audi” janë dërguar në spital dhe ndodhen jashtë rrezikut për jetën. Po ashtu, shoferi i automjetit tjetër ndodhet jashtë rrezikut.

Ndërkohë viktima është transportuar drejt morgut, ndërsa policia ndodhet në vendngjarje për të zbardhur dinamikën e aksidentit.

Paraprakisht dyshohet se shkak ka qenë shpejtësia tej normave të lejuara, e cila ka bërë të pamundur manovrimin e mjeteve.

Njoftimi i policisë:

Fier/Informacion paraprak

Në aksin rrugor “Levan-Tepelenë”, shtetasi G. M., 40 vjeç, duke drejtuar automjetin tip “Benz”, është përfshirë në një aksident rrugor me një automjet tip “Audi”, me drejtues shtetasin D. B., 55 vjeç.

Si pasojë e aksidentit, drejtuesi i automjetit tip “Audi”, shtetasi D. B., ka ndërruar jetë në vendngjarje.

Drejtuesi i automjetit tip “Benz”, shtetasi G. M., si dhe tre pasagjerët që ndodheshin në automjetin tip “Audi”, janë transportuar në spital për ndihmë mjekësore dhe ndodhen jashtë rrezikut për jetën.

Grupi hetimor ndodhet në vendngjarje dhe po punon për dokumentimin dhe sqarimin e plotë të rrethanave të aksidentit.