Zjarr në zonën e Gërhotit në Gjirokastër, zjarrfikësit ndërhyjnë në terren (VIDEO)

Në Gjirokastër në orët e mesditës të së kësaj të mërkure është shfaqur një zjarr problematik në zonën e Gërhotit. Flakët fillimisht përfshinë një sipërfaqe me shkurre në hyrje të qytetit.

I ndihmuar edhe nga terreni i thatë, zjarri u përhap në një sipërfaqe të gjerë pranë zonës së banuar. Është dashur ndërhyrja e Shërbimit Zjarrfikës për lokalizimin dhe shuarjen e flakëve.

Dyshohet që zjarri është ndezur për shkak bishtave të cigareve të hedhura pa kujdes në këtë zonë. Në këto ditë me temperatura të larta në Gjirokastër janë regjistruar disa zjarre masive në pyje-kullota ndërsa apelohet për evitimin e zjarrvënieve të qëllimshme.