U rikthye sot në atdhe/ Historia e dhimbshme e Hajrie Taushanit, e moshuara që udhëtoi drejt Sirisë për nipërit

Pesë shqiptarë, mes tyre tre fëmijë dhe një 79-vjeçare, janë riatdhesuar nga Siria dhe kanë mbërritur në Tiranë pak pas mesnatës së 26 gushtit. 

Pamjet e mbërritjes në Tiranë tregojnë momentet e kthimit të tyre në Shqipëri, pas përfundimit të operacionit të riatdhesimit të koordinuar nga autoritetet shqiptare dhe institucionet e vendeve të përfshira në këtë proces.

Mes të riatdhesuarve është edhe 79-vjeçarja Hajrie Taushani. Ajo kishte udhëtuar drejt Sirisë pas humbjes së djalit të saj, i cili ishte larguar drejt këtij vendi për t’iu bashkuar formacioneve të ISIS-it.

Taushani kishte shkuar për të marrë dhe për tu kujdesur për nipërit e saj.

Pas rënies së strukturave territoriale të ISIS-it, 79-vjeçarja kishte mbetur në kampin Al-Hol, ku ka jetuar në kushte të vështira, ndërsa vijonte të kujdesej për fëmijë të mitur, përfshirë edhe dy fëmijë jetimë që ndodheshin nën kujdesin e saj.

Ministria për Evropën dhe Punët e Jashtme bëri me dije se operacioni u realizua në koordinim me përfaqësitë diplomatike dhe konsullore shqiptare, si dhe autoritetet e vendeve të tjera të përfshira.

Pas mbërritjes në Shqipëri, pesë shtetasit do t’i nënshtrohen kontrolleve shëndetësore dhe vlerësimeve psikosociale, përpara se të vijojë procesi i akomodimit, rehabilitimit dhe riintegrimit të tyre