Tragjike në Gjermani, 19-vjeçarja kalon barrierat hekurudhore dhe përplaset për vdekje nga treni

Një aksident i rëndë hekurudhor ka ndodhur mbrëmjen e së mërkurës në lagjen Mahndorf të Bremenit, ku një 19-vjeçare ka humbur jetën pasi u godit nga një tren rajonal, ndërsa po kalonte një kalim hekurudhor në rrugën Eppenhainer Straße.

Sipas njoftimit të policisë, ngjarja ndodhi rreth orës 18:55, në drejtim të Ehlersdamm. E reja hyri në kalimin hekurudhor në momentin kur barrierat ishin të mbyllura, duke mos e vënë re trenin që po afrohej me shpejtësi. Makinisti e vuri re këmbësoren në kohë dhe aktivizoi frenat emergjente, por përplasja nuk mund të shmangej.

19-vjeçarja ndërroi jetë në vendin e ngjarjes për shkak të plagëve të rënda që mori. Hetimet paraprake të policisë përjashtojnë mundësinë e një vetëvrasjeje dhe e cilësojnë ngjarjen si një aksident tragjik.

Pas incidentit, trafiku hekurudhor në zonë u pezullua për disa orë, për të lejuar operacionet e emergjencës dhe mbledhjen e provave. Autoritetet po vijojnë hetimin për të sqaruar rrethanat e sakta të ngjarjes dhe për të zbuluar arsyet pse viktima injoroi sinjalizimin dhe barrierat mbrojtëse.

Policia e Bremenit u ka bërë apel qytetarëve që të respektojnë sinjalizimet dhe pengesat në kalimet hekurudhore, duke theksuar se çdo neglizhencë mund të rezultojë fatale.