Tragjedi në Dimal, 51-vjeçari humb jetën pasi e zë muri i banesës gjatë shembjes

Një ngjarje e rëndë ka ndodhur këtë të shtunë në fshatin Kutalli, në Njësinë Administrative Kutalli, pjesë e bashkisë Dimal, ku një 51-vjeçar ka humbur jetën tragjikisht.

Sipas informacioneve paraprake, viktima është identifikuar si Altin Hajdari, i cili po punonte për shembjen e një muri rrethues në banesën e tij. Gjatë procesit, muri është rrëzuar papritur dhe e ka zënë poshtë, duke i shkaktuar lëndime të rënda.

Të afërmit e tij e kanë transportuar me urgjencë drejt Spitalit Rajonal të Beratit, por fatkeqësisht mjekët konstatuan se ai kishte mbërritur pa shenja jete.

Grupi hetimor ndodhet në vendngjarje për të zbardhur rrethanat e plota të incidentit, ndërsa paraprakisht dyshohet se mungesa e masave mbrojtëse dhe ndërhyrja pa asistencë profesionale kanë qenë faktorët kryesorë të kësaj tragjedie.