Tentoi të vetëvritej me kallashnikov, arrestohet për armëmbajtje pa leje infermieri në Tiranë

Policia e Tiranës ka vënë në pranga infermierin Astrit Tota, i cili tentoi vetëvrasjen  me kallashnikov një ditë më parë. Ai është arrestuar për armëmbajtje pa leje.

“Specialistët për Hetimin e Krimeve të Komisariarit të Policisë Nr. 1 arrestuan shtetasin A. T., 53 vjeç, banues në Tiranë, pasi mbante pa leje, në banesë, një armë zjarri kallashnikov, me të cilën ka tentuar të vetëvritet ditën e djeshme.”

Ngjarja

Një infermier në Tiranë ka tentuar që t’i japë fund jetës duke u vetëqëlluar me kallashnikov.

Por për fat të mirë, plumbin e ka marrë mbi zemër, duke i kaluar tej për tej trupit, por pa i prekur asnjë organ jetësor. Burime nga policia bëjnë me dije se Astrit Tota, i cili punon infermier te Trauma, ndodhet në spital jashtë rrezikut për jetën.

“Më datë 28.05.2024, rreth orës 16:30, në rrugën “Mihal Grameno”, ka tentuar të vetëvritet me armë zjarri kallashnikov, në banesën e tij, shtetasi A. T., 53 vjeç, i cili ndodhet në spital, nën kujdesin e mjekëve. Arma e zjarrit u sekuestrua në cilësinë e provës materiale. Grupi hetimor po punon për sqarimin e rrethanave të ngjarjes”, sqaron policia në njoftimin zyrtar.