TENSIONE në Kuvend! Opozita nuk pret, me të mbaruar himni bllokon foltoren

Nis me tensione seanca plenare e parë për 2026-ën, teksa opozita ka bllokuar foltoren.

Sapo përfundoi Himni Kombëtar, deputetët e PD u nisën drejt foltores, duke e bllokuar, teksa deputeti Gazment Bardhi kërkoi largimin e zv.kryeministres dhe ministres Belinda Balluku nga salla, e po ashtu i kërkoi kryeparlamentarit Niko Peleshi të hapte votimin për heqjen e mandatit të saj. Ndërkohë, ky i fundit vijoi me leximin e fjalimit të tij hapës dhe rendit të ditës, teksa herë pas here hidhte batuta për të bërtiturat e Bardhit.

“Si nuk u lodhe o burrë”, dëgjohet Peleshi duke iu drejtuar Gazment Bardhit i cili fliste mbi fjalën e tij duke kërkuar largimin e zv. kryeministres nga salla e Kuvendit.

“Do kontrollosh ti Edi Ramën? Për kë kontroll po flet? Mblidh këshillin, dorëzoja drejtësisë”, dëgjohet Bardhi duke iu drejtuar Peleshit.