“Telefoni i Marios nuk gjendet”, vrasja e Martinit, gazetari: Ka një autor të dytë, do të largohet jashtë shtetit

Gazetari Eni Ferhati ishte këtë të diel i ftuar në “Review” në Euronews Albania për të folur rreth ngjarjes së rëndë ku mbeti i vrarë 14-vjeçari Martin Cani dhe u plagos shoku i tij Luis Meçe, teksa si autor i ngjarjes rezulton Mario Përlleshaj, ndaj të cilit është caktuar masa “arrest me burg”, por ndodhet në spital, pasi u plagos edhe vetë nga përleshja.

Ai tha se deri më tani Policia nuk e përjashtuar mundësinë e një autori të dytë, siç pretendon Luis Meçe dhe babai i tij.

Ferhati deklaroi se telefoni i autorit Mario Përlleshaj nuk është gjetur, pasi sipas tij, nëse gjendej, do ta zbardhte të gjithë ngjarjes.

“Çështja është se nuk është përjashtuar asnjëherë përfshirja e një personi të dytë. Megjithëse policia u mundua të ishte korrekte, deri më tani është vetëm një autor i dyshuar. çështja është që në këtë puzzle mungon për shembull, aparati celular i autorit të vetëm të dyshuar, Mario. Ky konflikt rezulton se ka qenë i shtrirë dhe i akumuluar për disa kohë. Nëse gjendet telefoni do ndihmojë në zbardhjen se si është organizuar, kush janë përfshirë e të tjerë”,-tha gazetari.

Ai tha gjithashtu se po aludohet se po ndihmohet “autori i dytë”, teksa sipas informacioneve të tij, ai do të largohet jashtë vendit.

“Aludohet se po favorizohet personi i mitur i dytë, i cili është fëmija i dikujt me pozicione publike. Mua personalisht nuk më rezulton. Një version, kam marrë informacion që do largohen jashtë vendit, por kjo mbetet për tu parë”,-tha gazetari.