“Të lutem më ço në spital”/ Shqiptari rreh gruan angleze, pranon akuzat në gjykatë

Një rast i dhunshëm ka tronditur Britaninë e Madhe, ku një shqiptar i quajtur Emiljano Cakraj, 33 vjeç, është akuzuar dhe dënuar për rrahjen brutale të një gruaje angleze në Forest Town më 23 janar të këtij viti. Ngjarja e rëndë filloi pas një debati mes tyre, ku Cakraj e goditi gruan me grusht dhe më pas tentoi ta mbyste, duke e kërcënuar me vdekje.

Pas sulmit, gruaja iu lut Cakrajt që ta çonte në spital, duke i premtuar se do të thoshte se kishte rënë nga shkallët për të mbrojtur veten.

Ai e detyroi të betohej se nuk do t’i tregonte askujt për ngjarjen dhe e mori në makinë. Pavarësisht se kaluan pranë spitalit, Cakraj vendosi të mos ndalte, çka e bëri gruan të frikësohej për jetën e saj. Ajo u shtir si e vdekur, shpresuar se kjo do ta shpëtonte.

Pas një kohe, Cakraj u fut në një parking dhe thirri dikë për ndihmë, i cili e çoi gruan në spital. Hetimet e policisë çuan në arrestimin e Cakrajt mëngjesin e 24 janarit, ku ai u akuzua për sulm të rëndë.

Gjatë gjykimit, u zbulua se ai kishte kërcënuar gruan përmes llogarive të rreme në rrjetet sociale dhe telefonatave anonime, duke i dërguar mesazhe kërcënuese, përfshirë një foto të paqartë të makinës së saj.