Situatë KRITIKE nga zjarret në Lurë/ Flakët rrezikojnë shtëpi të banuara, një person dërgohet në spital…

Situata nga zjarret në Lurë vijon të jetë kritike pasi flakët kanë marrë përmasa të mëdha dhe po rrezikojnë banesat në zonë. Forcat në terren po përpiqen të frenojnë përhapjen, ndërsa ndërhyrja po kryhet në disa fronte.

Mbi 170 forca janë angazhuar që prej orëve të para të mëngjesit në operacionin për shuarjen e vatrave. Në terren ndodhen punonjës të Bashkisë Dibër, të zonave të mbrojtura, forcat e ushtrisë dhe Policia e Shtetit.

Në mbështetje të tyre janë dërguar edhe dy avionë, të cilët kanë ndërhyrë për të frenuar përhapjen dhe mbrojtur zonat e banuara.

Autoritetet dyshojnë se zjarret mund të jenë të qëllimshme, pasi janë evidentuar disa vatra në zona të ndryshme. Për shkak të situatës së rënduar, prej ditës së djeshme në Lurë ka qëndruar edhe një ambulancë me staf mjekësor.

Raportohet se një person është lënduar si pasojë e asfiksisë nga tymi dhe ka marrë ndihmë mjekësore në spital.

Ndërhyrja vijon si nga toka, ashtu edhe nga ajri, ndërsa prioritet mbetet shmangia e përhapjes së flakëve drejt banesave.