Shiste drogë pranë shkollave dhe lokaleve, arrestohet 27-vjeçari te “Petro Nini Luarasi” në Tiranë

Forca e Posaçme “Shqiponja” ka goditur një tjetër rast të shpërndarjes së lëndëve narkotike në Tiranë, duke vënë në pranga një 27-vjeçar që shiste cannabis në rrugën “Petro Nini Luarasi”.

Sipas Policisë, gjatë operacionit u arrestua shtetasi me iniciale A.H. (H), 27 vjeç, banues në Tiranë, ndërsa u procedua penalisht edhe shtetasi R.L., pasi iu gjet një sasi e vogël lënde narkotike që dyshohet se e kishte blerë nga i arrestuari.

Gjatë kontrolleve, shërbimet e Forcës së Posaçme “Shqiponja”, në bashkëpunim me specialistët për Hetimin e Narkotikëve, sekuestruan një sasi cannabis.

Operacioni u zhvillua në kuadër të kontrolleve intensive për evidentimin dhe goditjen e rasteve të shpërndarjes së drogës, kryesisht pranë shkollave, lokaleve dhe ambienteve të ndryshme në kryeqytet.

Materialet procedurale i janë referuar Prokurorisë për veprime të mëtejshme.