Sekuestrohet 5 kg kok'ainë dhe heroi'në me vlerë mbi 500 mijë euro në Tiranë/ Publikohen emrat e të arrestuarëve

Detaje të reja janë zbardhur nga operacioni antidrogë i koduar “Drejtimi”, i zhvilluar nga strukturat e Policisë së Tiranës, ku u sekuestrua një sasi e konsiderueshme lëndësh narkotike.

Sipas të dhënave nga hetimi, Antidroga e Policisë së Tiranës përdori metoda speciale të hetimit për të dokumentuar aktivitetin e personave të dyshuar.

Mirland Herri dhe Lufti Hoxha janë mbajtur prej disa ditësh nën vëzhgim nga strukturat hetimore, përpara ndërhyrjes së policisë.



Gjatë operacionit janë sekuestruar rreth 5 kilogramë lëndë narkotike, konkretisht 3 kilogramë kokainë dhe 2 kilogramë heroinë. 

Sipas përllogaritjeve paraprake, nëse kjo sasi do të hidhej në treg dhe do të shitej në doza, vlera e saj do të arrinte në mbi 500 mijë euro.

Sasia e sekuestruar konsiderohet ndër sasitë më të mëdha të drogave të forta të sekuestruara nga Policia e Tiranës në kuadër të operacioneve të fundit kundër narkotikëve.

Hetimet vijojnë për të zbardhur të gjithë skemën, personat e tjerë që mund të jenë të përfshirë dhe destinacionin e lëndës narkotike.