Sapo u mbush me karburant, digjet në ecje makina në Maliq, lëndohet shoferi dhe pasagjeri

Një ngjarje e rëndë ka ndodhur mëngjesin e sotëm në Maliq. Policia ka bërë me dije se një makinë është djegur në ecje pasi u mbush me karburant. Sipas njoftimit zyrtar, shoferi dhe pasagjeri në makinë kanë pësuar djegie, por nuk dihet gjendja e tyre shëndetësore.

“Maliq/Informacion paraprak. Më datë 01.09.2021, rreth orës 07:20, në fshatin Vloçisht, Maliq, ka rënë zjarr në një automjet në ecje, i cili sapo ishte furnizuar me lëndë djegëse (gas) në një karburant në afërsi të këtij fshati.

Për pasojë kanë pësuar djegie, drejtuesi dhe pasagjeri të cilët u dërguan për mjekim në Spitalin e Korçës. Shërbimet e zjarrfikëses, kanë bërë të mundur fikjen e zjarrit. Grupi hetimor po punon për zbardhjen e rrethanave të ngjarjes”, njofton policia.