Rrahu gardianin e burgut të Fierit bashkë me disa të tjerë! Arrestohet 32-vjeçari i dënuar për vrasje

Policia e Fierit ka arrestuar një 32-vjeçar me precedentë penalë të mëparshëm, i cili ishte në kërkim për sulm ndaj një punonjësi të IEVP Fier. Ngjarja kishte ndodhur më 11 mars 2025, kur gardiani u godit me grushte nga disa persona për shkak të detyrës.

I arrestuari, M. P., banues në Patos, rezulton i dënuar më parë për vrasje dhe armëmbajtje pa leje. Sipas autoriteteve, ai është një nga autorët e dyshuar që, në bashkëpunim me shtetasit A. M., E. N. dhe E. R., ka goditur punonjësin e burgut.

Gjykata e Fierit i kishte caktuar masën e sigurisë “arrest në burg” për veprën penale “Goditja për shkak të detyrës”, kryer në bashkëpunim. Policia po vijon punën për kapjen e tre personave të tjerë të shpallur në kërkim. Materialet procedurale i janë referuar Prokurorisë së Fierit për veprime të mëtejshme ligjore.