Reforma territoriale/ Këshilli i Bashkisë Mat jep “dritën jeshile” për bashkimin me Klosin

Këshilli i Bashkisë Mat ka miratuar me 14 vota pro, 5 kundër dhe 1 abstenim mendimin lidhur me reformën administrative-territoriale.

Pas përmbylljes së dëgjesave publike në 8 njësitë administrative, Këshilli i Bashkisë Mat zhvilloi këtë të hënë një mbledhje jashtë radhe, ku mes disa pikave të rendit të ditës ishte edhe diskutimi për reformën administrative-territoriale.

Në mbledhje ishin të pranishëm 20 nga 21 këshilltarët që përbëjnë Këshillin Bashkiak Mat.

Në fokus të diskutimeve ishte projekt-drafti për reformën administrative-territoriale 2.0, i propozuar nga mazhoranca. Sipas propozimit, Bashkia Klos nuk do të jetë më njësi e veçantë e vetëqeverisjes vendore, por do t’i bashkohet Bashkisë së Matit.

Këshilltarët e pranishëm shprehën qëndrimet e tyre lidhur me propozimin, ndërsa pas diskutimeve të zhvilluara pika për reformën territoriale u kalua në votim.

Në përfundim, 14 këshilltarë votuan pro draftit të propozuar nga mazhoranca, 5 votuan kundër dhe 1 abstenoi.

Pas këtij vendimi, Këshilli Bashkiak Mat dhe Kryetari i Bashkisë do të dorëzojnë pranë Kuvendit të Shqipërisë mendimin e tyre lidhur me propozimin për bashkimin e bashkive Mat dhe Klos në një njësi të vetme të vetëqeverisjes vendore.

Drafti final pritet të kalojë në Kuvend për votim më 8 tetor, ku do të vendoset për hapat e mëtejshëm të reformës administrative-territoriale.